Lanmou pa janm mouri.

Èske w ka vrèman defini sa k lanmou

menmlè w ta rive santi l

tou bosal oubyen trankil

Kit li ta fè kè w leje pandan lang ou lou

Lanmou konn fè granmoun parèt piti

Li fè vyeja rajeni san l pa nan zokiki

Lanmou ka fè jèn jwe nan pwèl ak bab blanch

Lanmou ka fè rich jwenn bonè l nan yon modès kay planch

Lanmou se sèl fil zarenyen ki pa pè kòn towo

Li ka frape w atè epi trennen w lè ògèy ou twò wo

Li pa konn ni kretyen ni vodouyizan ni ate

Se sèl vwa lè l ap pale menm soudè tande

Se lanmou ki kreye kit sentaniz kit grandèt

Li ka fè w prete sa w p ap janm ka remèt

Lanmou se sèl richès ki pa pè okenn gran dèt

e li poko janm fè defèt men l abitye fè de fèt

Si m di lanmou p ap janm mouri

sa t ap sanble yon foli oubyen yon idyosi

Puiske l pa gen yon kote l kòmanse pou l ta fini

men si m di l se paske se atravè nou li akonpli

nan imilite san koupi san fè dyòl pwenti

Lanmou jis itilize nou kòm pwòp veso mòtèl

pou nou pataje l kòm zo kòt youn ak lòt kòm

san ipokrizi e san n pa bay li matlòt

Paske l se limyè lavi nan tout kè etensèl

Ou ka chwazi viv sèl

men si w viv san lanmou w ap etenn sèl.