Ayiti lespwa ou dezespwa

Mo yo pa pale ankò ,

yo pè fè eko

nan mitan kout zam.

K ap chante 

Vil la tounen simityè 

kote lavi ap dòmi san drap.

Pyebwa pa fleri,

tchovi yo san abri 

Solèy la, leve, 

Men li pa chofe 

Lespwa pèdi pye

Yo mete laperèz 

kote k te gen lanmou. 

Yo pran vwa nou, 

Yo mete silans sou rèl nou.

Men nou la 

tankou flanm 

ki refize mouri, 

tankou pyebwa 

k ap grandi 

nan mitan debri.

N ap leve, 

n ap reve 

Yo men m y ap pyafe 

Sou kadav on pèp 

San espwa 

Lavi klore sou kwa

Ap gade leta 

K ap bay lanmò ochan